NIN REPAGO NIN DEBEDA

NIN REPAGO HOSPITALARIO DE FÁRMACOS...NIN PAGO DA DÉBEDA. 
 O alcalde de Riotorto, en Lugo, anunciou que ese Concello asumiría o coste a maiores que supón o copago de medicamentos de dispensación hospitalaria. O rexidor convocou a finais de Outubro unha asemblea aberta da que xurdíu a proposta de esixir a Feijóo a derogación en Galicia desa norma do Estado Español. Mais de 150 organizacións sociais e varios alcaldes galegos de diferentes partidos se sumaron á proposta.

Esta iniciativa é moi importante no proceso de loita que se está a dar en Galicia e no Estado contra o PP e contra o resto de gobernos amigos dos banqueiros porque:
- Xurde das propias institucións e de militantes de partidos totalmente acomodados no sistema, e deseguido cala nun importante número de cidadáns, colectivos e algúns políticos galegos.
- Supón unha nova escalada na unidade das loitas.
- É unha importante fisura nas institucións (concellos, Xunta, Goberno do Estado, Europa) e nos partidos que as dominan.
- Tamén é outra mostra máis de que a maioría das leis que se aproban teñen que ser impostas, pois atentan directamente contra os nosos intereses, e por iso esta loita debe representar un paso máis na asimilación colectiva de que institucionalmente non é posible solución, e que só coa presión popular na rúa, coas ideas ben claras, poderá mudarse a situación.

Aínda que precisamente por isto último pode ser que teña certo cheiro electoralista: alcaldes e partidos que fan ver a súa "rebeldía ante o sistema" cara ós votantes, pero que saben perfectamente que non é posible que poidan facer moito no marco actual. Por un lado, quen asume o repago non son os Concellos, senón a cidadanía, xa que ese repago sairá igualmente dos nosos petos, a través de impostos ou taxas, ou ben desviando cartos doutras partidas. Por outro dase unha visión parcial do problema, ó condenar o repago de fármacos a enfermos crónicos graves, pero non meter no mesmo saco todos os repagos, taxas xudiciais, recortes, privatizacións...

Non queren focalizar o problema de fondo, que é unha débeda pública ilexítima. Todos estes ataques veñen impostos por unha reforma constitucional que ordenou a UE e a Troika fai dous anos, que PSOE e PP pactaron ás agachadas da xente, e que obriga ó Estado a pagar a débeda cos bancos por riba doutras consideracións, mesmo da saúde, a educación e as pensións. Débeda que non se adquiríu para facer mellora algunha, senón para que asumíramos nós as enormes perdas do sector privado, e enriquecer así aínda máis a grandes empresarios e banqueiros, a costa por suposto dos nosos dereitos fundamentais.

Dubidamos que os partidos e sindicatos institucionais estean interesados en amosa-la verdadeira causa dos problemas: por un lado este sistema, que permite que os pobos paguen a crise que provocaron os bancos e as grandes empresas, que aínda nestes anos acumulan beneficios millonarios, e por outro lado, a idea actual de Unión Europea, na que gobernan eses mesmos banqueiros e empresarios. De todos modos apoiamos totalmente a iniciativa de esixir a Feijóo que non aplique o copago hospitalario de fármacos en Galicia, ignorando as ordes do goberno do Estado e as recomendacións da UE, e seguiremos a denunciar a ilexitimidade da débeda e a loitar polo non pago da mesma.

Nos sumamos polo tanto ás convocatorias do 8 de Novembro na Coruña e do 17 de Novembro en Compostela, e animamos a todo o mundo a se unir e participar nesta protesta para que acade o carácter popular necesario para que os partidos e sindicatos institucionais non consigan convertila en papel mollado.